ALGA və AAA finalda!

27 aprel 2008-ci il tarixində “ADR-90” turnirinin yarımfinal oyunları keçirilmişdir. İlk matçda ALGA ilə OL!, ikinci matçda isə AAA ilə Dalga komandaları üz üzə gəldilər.

İlk oyun proqnozlaşdırıldığı kimi çox gərgin keçdi. Hər iki komandanın oyuna ehtiyatlı başlayacağı gözlənilsə də, OL! ilk dəqiqələrdə bir neçə yadda qalan hücum təşkil etdi və hesabı açmağa müvəffəq oldu. OL-dan Vüsal Əliyev fərqləndi. Hesabda önə keçən OL-çular risk etməmək qərarına gəldilər və müdafiəyə diqqəti artırdılar. Bu səbəbdən ALGA hücumçularının hesabı bərabərləşdirmək cəhdləri bir nəticə vermirdi. Lakin birinci hissənin sonunda meydanın mərkəz hissəsindən sürətli hücum təşkil edən ALGAçılar hesabı bərabərləşdirdilər. Bu dəfə turnirdə ALGA-nın ən məhsuldar oyunçusu Cavid Abdullayev fərqləndi. Birinci hissə 1:1 hesabı ilə bitdi. İkinci hissə ilk hissəyə nisbətən daha da sürətli başladı. OL komandasının zəif nöqtəsini tapan rəqiblər Orxan Mehdiyevin qolu sayəsində hesabda irəli çıxdılar. Lakin bu OL-çuları ruhdan salmadı və onlar qısa vaxt ərzində hesabı bərabərləşdirdilər. İki müdafiəçini sürət hesabına keçən Urfan Əsədov daha əlverişli vəziyyətdə olan Vüsal Əliyevə dəqiq pas ötürdü, o isə öz növbəsində bu imkandan səmərəli istifadə etdi. Hesab bərabərləşəndən sonra bir müddət oyunda gərginlik hiss olundu. Hər iki komanda həm müdafiədə, həm də hücumda əla oyun nümayiş etdirdilər. Hücumların birində ALGA-çılar OL-un müdafiəsini azlıqda yaxalaya bildilər və Ruslan Əmirov ALGAnı hesabda yenidən irəli çıxardı. Bu qoldan sonra OL hesabı bərabərləşdirmək üçün oyuna 3 hücumçu ilə davam etməli oldu. Lakin rəqib komandanın müdafiədə dəqiq oyunu onların imkanlarını heçə endirdi. Əvəzində isə OL-çuları əks-hücumda yaxalayan liberallar iki dəfə fərqləndilər. ALGAdan Orxan Mehdiyev və Ruslan Əmirov hərəyə bir qol vurdular. OL isə yalnız bir qolun əvəzini çıxa bildi. Oyunda son nöqtəni OL komandasının ən məhsuldar oyunçusu Urfan Əsədov qoydu. 5:3





Final oyununda ALGA ilə qarşılaşacaq növbəti komanda AAA ilə Dalğa-nın oyunundan sonra həll olunmalı idi. Hər iki komanda çempionat ərzində tərifəlayiq əzmkarlıq, son dəqiqəyədək döyüşmək qabiliyyəti və komanda oyunu nümayiş etdirmişlər. Komandaların qrup mərhələsində oyunlarının statistikası azca olaraq AAA-yin xeyrinə olsa da belə yarımfinal mərhələsində bu heç bir əhəmiyyət kəsb etmirdi. Yarımfinal oyununda Dalğanın iki aparıcı oyunçusunun meydançaya çıxmamağı məzunlara əlavə üstünlük verəcəkdi. Lakin buna baxmayaraq ilk dəqiqələrdən bəlli oldu ki matç çox sürətli və gərgin olacaqdır. Birinci hissənin ilk 15 dəqiqəsində AAA komandası topa daha çox nəzarət etsə də, dalğaçıların kəskin hücumları və sürətli keçidləri üstünlüyün hansı komandada olmasına qərar verməyə imkan vermirdi. Hər iki komandanın oyunçuları müdafiədə diqqətli oynadıqlarından hesabı açmaq mümkün olmamışdır. Yalnız ilk taymın ortalarında Dalğa-çıların hücumunun nəticəsində sürətli əks-hücum qurmuş AAA komandası hesabı Tağı Tağızadənin vasitəsilə aça bildi. AAA-in növbəti qolunu Azər Məmmədov standart vəziyyətindən cərimə zərbəsilə birinci taymın sonunda vurdu. Komandalar 2:0 hesabı ilə fasiləyə getdilər.

İkinci taymda hesabı bərabərləşdirməyə atılmış dalğaçılar ardıcıl olaraq kəskin hücumlar həyata keçirtdilər. Dalğanın hücumçuları həm yaxın həm də orta və uzaq məsafələrdən zərbələr yetirmiş və yalnız AAA-in qapıçısı Nurin Həsənovun gözəl oyunu sayəsində hesab dəyişməmişdir. İkinci taymın ilk 5 dəqiqəsində dalğaçıların aramsız hücumları nəticəsində büdrəməmiş AAA komandası Tural Yusifov, Cavid Aslanov və Azər Məmmədovla ardıcıl olaraq daha 3 qol vurmuş və hesabı 5:0 çatdırmışlar. Hesabda geridə qaldıqlarına baxmayaraq Dalğa daim döyüşkən və əzmkar olduqlarını nümayiş etdirmiş və bunun nəticəsində Elşən Poladlının oyundan və Araz Qasımovun cərimə zərbəsindən vurduqları iki qolla hesabı 5:2 etmişlər. İki qol buraxmış AAA komandası həmin günü qələbəni əldən vermək niyyətində olmadığını Dmitriy Kirilovun cərimə nöqtəsindən edilmiş ötürməni vurduğu gözəl qol ilə aydın etdi. Oyunun yekun hesabi 6:2 AAA komandasının xeyrinə oldu.

Yarımfinal oyunlarının nəticəsində finala qrup mərhələsində hərəsi öz qrupunda birinci yer tutmuş ALGA və AAA komandaları çıxdılar. 3-cü yer uğründa oyun isə OL! və Dalğa komandaları arasında keçiriləcəkdir. Oyunlar may ayının 3-ü saat 12:00 və 13:00-da keçiriləcəkdir.

AAA - Dalğa 6:2

27 aprel, 14:00. Olimpik Star

1-ci hissə: Tağı Tağı-zadə 1:0, Azər Məmmədov 2:0

2-ci hissə: Tural Yusifov 3:0, Cavid Aslanov 4:0, Azər Məmmədov 5:0, Elşən Poladlı 5:1, Araz Qasımov 5:2, Dmitriy Kirillov 6:2

ALGA - OL 5:3

27 aprel, 13:00. Olimpik Star

1-ci hissə: Vüsal Əliyev 0:1, Cavid Abdullayev 1:1

2-ci hissə: Orxan Mehdiyev 2:1, Vüsal Əliyev 2:2, Ruslan Əmirov 3:2, Orxan Mehdiyev 4:2, Ruslan Əmirov 5:2, Urfan Əsədov 5:3

Sarı vərəqə: Urfan Əsədov (OL)

Yarımfinal cütlükləri müəyyənləşdi

Aprel ayının 19-u və 20-si "ADR-90" Futzal Turnirinin qrup mərhələsinin son oyunları keçirildi. "B" qrupunda yarımfinalçılar bir həftə öncədən müəyyən olunduğundan bütün diqqət "A" qrupuna yönəlmişdi. Bu qrupda hər şey məhz bu tur aydın olacaqdı.

Turun mərkəzi oyunu aprel ayının 19-u saat 12:00-da keçirilən Dalğa - İrəli matçı idi. Xatırladaq ki, növbəti mərhələyə çıxmaq üçün dalğaçılara yalnız qələbə lazım idi. İrəliçilər isə öz növbəsində heç-heçə də kifayətlənə bilərdilər. Matç çox sürətli başladı. Hər iki komanda ilk dəqiqələrdən oyuna nəzarəti almağa can atırdılar. Lakin qol vurmaq istəyi komandaların müdafiəsində müəyyən boşluqlar yaratdı ki, bu da ilk qolda özünü büruzə verdi. Bütün komanda ilə hücuma atılan dalğaçılar orta xətdə topu itirdikdən sonra İrəlinin 3 oyunçusu qapıçı ilə təkbətək qaldılar. Bu imkandan İrəlinin turnirdə ən sərrast oyunçusu Xəyal Niftəliyev məharətlə istifadə etdi. Lakin Dalğa belə asanlıqla məğlub olmaq istəmədiyini sübut etdi. Növbəti hücumlarında dalğaçıların qapı ağzından vurduqları zərbə rəqib komandanın müdafiəçisinin ayağından qapı xəttindən keçdi. Birinci hissə 1:1 hesabı ilə bitdi. İkinci hissə başlayan kimi oyun dalğaçılar yenidən hücuma atıldılar və hücumların birində dalğaçılar matçda ilk dəfə olaraq hesabda önə çıxdı. Bu dəfə isə növbə Dalğanın ən sərrast oyunçusu Rövşən İsmayılovun idi. O, komandanın əzmkarlı hücumunu qol ilə tamamlaya bildi. Hesabda önə çıxdıqdan sonra dalğaçılar oyunda əmin oynamağa başladılar. Lakin hətta belə vəziyyətdə İrəli hücumçuları həvəsdən düşmədilər və sonadək mübarizəyə davam edəcəklərini nümayiş etdirdilər. İrəliçilərin hücumu nəticəsində Dalğanın qapısı önündə təyin olunan cərimə zərbəsini Firdovsi Tahirov ustalıqla istifadə etdi. Hesab bərabərləşəndən sonra oyunda gərginlik hiss olunmağa başladı. Hətta hər komanda sarı vərəqə ilə cəzalandırıldı. Dalğanın kapitanı Ceyhun İsayev isə öz növbəsində rəqib komandanın hücumu zamanı topu əl ilə saxladığına görə qırmızı vərəqə aldı. Oyun son dəqiqələrə qədər heç-heçə davam edirdi. Lakin son dəqiqələr irəli qapısı önündə təyin olunmuş 10 metrlik zərbə oyunun nəticəsini bəlli etdi. Topa yaxınlaşan Rövşən İsmayılov qapıçıya heç bir şans qoymadı. 3:2 və Dalğa yarımfinaldadır!

Günün ikinci oyunu ALGA - Rotarakt oldu. Bu oyun Rotarakt üçün qalib gəlmək üçün turnirdə son imkan idi. Lakin ilk dəqiqələrdən ALGA oyunda sensasiya yol verməyəcəklərini göstərdilər. Birinci hissə 4:0 hesabı ilə başa çatdı. İkinci hissədə isə müqavimət göstərməyən Rotarakt ilk 2 turda etdiyi səhvləri təkrarladı. Oyunun 14:1 hesabı ilə bitdi.

Beləliklə "A" qrupunda birinci yerə 7 xalla ALGA komandası çıxdı. İkinci yerdə isə 6 xalla Dalğa qərarlaşdı.

Növbəti gün isə "B" qrupunun oyunları keçirildi. İlk olaraq meydançaya OL və AAA komandaları çıxdılar. Bu komandaların oyunun nəticəsi yarımfinal cütlüklərini müəyyən edəcəkdi. Hər iki komanda yarımfinala çıxışını öncədən təmin etdiyi üçün oyunun sönük keçəcəyi proqnozları özünü doğrultmadı. Oyunun ilk dəqiqələrindən komandalar qələbə niyyətlərini ortaya qoydular. Matçın ilk dəqiqələrində hücumlarını dəqiq nəticələndirə bilməyən OL-çular birinci hissənin son hissələrində 0:1 hesabı ilə məğlub duruma düşdülər. Birinci hissə bu hesabla da bitdi. İkinci hissə başlayan kimi OL-çular hücuma atıldılar və hücumların birində hesabı bərabərləşdirməyə nail oldular. İkinci hissənin son dəqiqələrində isə daha dəqiq və səhvsiz oynayan Amerika məzunları hesabda önə çıxdılar və oyunda üstünlüyü əldən vermədilər. Matçın son dəqiqələrində isə OL-çuların müdafiədə diqqətsiz oyunundan istifadə edərək, AAA oyunçuları daha 2 qol vurmaqla matçı 1:4 hesablı qələbə ilə bitirdilər.

Turun son matçı AN və Stimul arasında keçirildi. Bu matçda komandalar açıq futbol sərgilədilər və turnirin ən produktiv oyununa imza atdılar. Hesab 18:9 AN komandasının qələbəsi ilə bitdi.

"B" qrupunda 9 xalla "AAA" birinci yerdə və 6 xalla "OL!" ikinci yerdə qərarlaşdı.

Bununla da yarımfinal cütlükləri müəyyən olundu. 27 aprel tarixində keçiriləcək matçların qrafiki aşağıdakı kimidir.

27 aprel 13:00 ALGA - OL
27 aprel 14:00 AAA - Dalğa

AN - Stimul 18:9

20 aprel, 15:00. Olimpik Star

1-ci hissə: Şahin Məmmədov 1:0, Elşən Güləliyev 1:1, Şahin Məmmədov 2:1, Nurulla Nəsibov 2:2, Şahin Məmmədov 3:2, Seymur Hüseynov 4:2, Elşən Güləliyev 4:3, Elşən Güləliyev 4:4, Şahin Məmmədov 5:4, Seymur Hüseynov 6:4

2-ci hissə: Şahin Məmmədov 7:4, Seymur Hüseynov 8:4, Seymur Hüseynov 9:4, Şahin Məmmədov 10:4, Seymur Hüseynov 11:4, Seymur Hüseynov 12:4, Şahin Məmmədov 13:4, Elçin Güləliyev 13:5, Nurulla Nəsibov 13:6, Seymur Hüseynov 14:6, Vüsal Əhmədov 14:7, Elçin Güləliyev 14:8, Şahin Məmmədov 15:8, Elşən Güləliyev 15:9, Şahin Məmmədov 16:9, Seymur Hüseynov 17:9, Şahin Məmmədov 18:9

OL - AAA 1:4

20 aprel, 14:00. Olimpik Star

1-ci hissə: Tağı Tağı-zadə 0:1

2-ci hissə: Urfan Əsədov 1:1, Elçin İbadov 1:2, Sərvət Məhərrəmov 1:3, Elçin İbadov 1:4

Sarı vərəqə: Urfan Əsədov, Rəşad Həsənov, Vüqar Salamlı

ALGA - Rotarakt 14:1

19 aprel, 13:00. Olimpik Star

1-ci hissə: Ruslan Əmirov 1:0, Cavid Abdullayev, 2:0, Pərviz Məmmədov 3:0, Cavid Abdullayev 4:0

2-ci hissə: Cavid Abdullayev 5:0, Cavid Abdullayev 6:0, Pərviz Məmmədov 7:0, Pərviz Məmmədov 8:0, Cavid Abdullayev 9:0, Cavid Abdullayev 10:0, Elnur Adıyev 11:0, Ruslan Əmirov 12:0, Cavid Abdullayev 13:0, Pərviz Məmmədov 14:0, Elçin Rzayev 14:1

Dalğa - İrəli 3:2

19 aprel, 12:00. Olimpik Star

1-ci hissə: Xəyal Niftəliyev 0:1, İrəli öz qapısına 1:1

2-ci hissə: Rövşən İsmayılov 2:1, Firdovsi Tahirov 2:2, Rövşən İsmayılov 3:2

Sarı vərəqə: Ceyhun İsayev (Dalğa), Ceyhun Məmmədov (İrəli), Emin Hüseynov (Dalğa)

Qırmızı vərəqə: Ceyhun İsayev (Dalğa)

İlk yarımfinalçılar bəlli oldu

Bu həftə sonu “ADR - 90” Futzal Turnirinin qrup mərhələsinin ikinci tur matçları keçirildi. Aprel ayının 12-si “B” qrupu komandaları öz qüvvələrini sınadılar. İlk olaraq meydançaya OL və AN komandaları çıxdılar. OL-çular matçın birinci hissəsində 4 top fərqlə irəli çıxmalarına baxmayaraq AN fasilədən sonra dalbadal keçirdiyi sürətli hücumlar sayəsində hesabı 4:2 etdi. Bundan sonra bir neçə səmərəli əvəzetmələr həyata keçirən OL komandası qələbəni əldən vermədi. Matç 10:3 hesabı ilə başa çatdı. OL-un hücumçuları Urfan Əsədov və Sənan Mirzəyev birlikdə 8 qol vurmaqla turnirin bombardirləri siyahısında ilk 2 yerdə mövqelərini möhkəmlətdilər. Hal hazırda onlar müvafiq olaraq 8 və 7 qol vurublar.

Günün ikinci matçı AAA və Stimul komandaları arasında keçdi. Stimul komandası ilk dəqiqələrdən birinci turdakı böyük hesablı məğlubiyyətin təsadüf olduğunu sübut etdi. Müdafiədə ayıq oyun nümayiş edən stimulçular birinci hissənin ortalarında hesabı açdılar. İlk hissə bu hesabla da nəticələndi. Bu matçda məğlubiyyət AAA komandasının planlarına daxil deyildi. Bu səbəbdən ikinci hissə başlayan kimi, Amerika məzunları aramsız hücumlar təşkil etməyə başladılar. Ardı kəsilməyən hücumlar öz nəticəsini verdi. İlk olaraq, AAA ikinci hissəsinin ortalarında hesabı bərabərləşdirdi, matçın son dəqiqəsində isə qələbə qolunu vurmağa müvəffəq oldular. Çox gərgin keçən matç 2:1 hesabı ilə başa çatdı.

“B” qrupunda ikinci turun oyunları nəticəsində OL və AAA 6 xal toplamaqla yarımfinala çıxışlarını rəsmiləşdirdilər. Üçüncü turda bu komandalar arasında keçiriləcək matç isə qrupda birinci və ikinci yerləri müəyyən edəcək. Qeyd edək ki, bu qrupun qalibi A qrupunun ikincisi ilə qarşılaşacaq.

Aprel ayının 13-ü isə “A” qrupunun matçları keçirildi. İlk olaraq ikinci turun mərkəzi oyunu olan Dalğa - ALGA matçı keçirildi. Bu cütlükdə qələbəni Dalğa qazanacağı halda yarımfinala çıxışı təmin edəcəkdi, ALGA-nın qələbəsi isə bu komandanın yarımfinala yolunu xeyli asanlaşdıracaqdı. Gərgin keçən matçda hesabı dalğaçıların hücumçusu, turnirin bombardirləri sırasında olan Rövşən İsmayılov açdı. Bununla da o, vurduğu qolların ümumi sayını altıya çatdırdı. Birinci hissənin qalan vaxtında ALGA 2 qol vurmaqla hesabda önə çıxdı. İkinci hissənin əvvəlində liberalların üçüncü qolu vurmağa nail olması, dalğaçıların bundan sonra hücuma böyük qüvvə ilə atılmasına səbəb oldu. Ardı kəsilməyən hücumlar nəticəsində Dalğa hesab arasındakı fərqi minimuma endirdi. Hesabı bərabərləşdirmək istəyi dalğaçıların müdafiəyə diqqətini azaltdı. Bu isə liberallara oyunda son nöqtəni qoymağa imkan yaratdı. Müdafiədəki boşluqlardan istifadə edən ALGA hesabı bir daha artıra bildi. Beləliklə matç 2:4 ALGA komandasının xeyrinə başa çatdı.

İkinci turun son oyunu İrəli və Rotarakt komandaları arasında keçirildi. Bu matçın ilk 5 dəqiqəsində ardıcıl dəqiq hücumlar keçirən irəliçilər 4 qol vurmaqla, matç haqqında yarana biləcək bütün suallara aydınlıq gətirdilər. İlk hissə 8:0 hesabı ilə nəticələndi. İkinci hissədə isə tempi saxlayan İrəli komandası matçı 14:0 hesabı yekunlaşdırdı. Qeyd etmək lazımdır ki, bu matçda hakim əlini 4 dəfə sarı vərəqəyə atmalı oldu. O, bir dəfə sarı vərəqə ilə irəliçiləri, üç dəfə isə Rotarakt oyunçularını "mükafatlandırdı". Qalib komandanın hücumçusu Xəyal Niftəliyev Rotarakta vurduğu 4 qoldan sonra, bombardirlər siyahısında dalğaçı Rövşən İsmayılovla üçüncü yeri bölüşdürürlər

“B” qrupundan fərqli olaraq “A” qrupunda vəziyyət mürəkkəbliyini saxlayıb. Yarımfinala çıxmaq üçün dalğaçılara İrəli ilə matçda yalnız qələbə lazımdır. İrəliçiləri isə heç-heçə də qane edir. ALGA-ya Rotarakt ilə matçda məğlub olmamaq kifayətdir ki, növbəti mərhələyə çıxışını təmin etsin.

Beləliklə növbəti həftə sonu keçiriləcək matçların qrafiki:

19 aprel 12:00 Dalğa – İrəli
19 aprel 13:00 ALGA - Rotarakt
20 aprel 14:00 OL - AAA
20 aprel 15:00 AN - Stimul

İrəli - Rotarakt 14:0

13 aprel, 15:00. Olimpik Star

1-ci hissə: İsmayıl Xanlarov 1:0; Xəyal Niftəliyev 2:0; Ceyhun Məmmədov 3:0; Xəyal Niftəliyev 4:0; Xəyal Niftəliyev 5:0; Xəyal Niftəliyev 6:0; Nicat Abbasov 7:0; İsmayıl Xanlarov 8:0

2-ci hissə: Taleh Kərimov 9:0; Firdovsi Tahirov 10:0; Nicat Abbasov 11:0; Nicat Abbasov 12:0; Əlövsət Heydərov 13:0; İsmayıl Xanlarov 14:0

Sarı vərəqə: Firdovsi Tahirov (İrəli); Ağamurad Muradov (Rotarakt); Emil Məhərrəmov (Rotarakt); Kamal Haqverdiyev (Rotarakt)

Dalğa - ALGA 2:4

13 aprel, 14:00. Olimpik Star

1-ci hissə: Rövşən İsmayılov 1:0; Orxan Mehdiyev 1:1; Orxan Mehdiyev 1:2

2-ci hissə: Emin Məmmədov 1:3; Zaur Əliyev 2:3; Emin Məmmədov 2:4

Sarı vərəqə: Emin Məmmədov (ALGA)

AAA - Stimul 2:1

12 aprel, 13:00. Olimpik Star

1-ci hissə: Elçin Güləliyev 0:1

2-ci hissə: Tural Yusifov 1:1; Elçin İbadov 2:1

Sarı vərəqə: Cavid Aslanov (AAA)

OL - AN 10:3

12 aprel, 12:00. Olimpik Star

1-ci hissə: Sənan Mirzəyev 1:0; Urfan Əsədov 2:0; Urfan Əsədov 3:0; Urfan Əsədov 4:0

2-ci hissə: Şahin Məmmədov 4:1; Şahin Məmmədov 4:2; Vüqar Salamlı 5:2; Sənan Mirzəyev 6:2; Sənan Mirzəyev 7:2; Urfan Əsədov 8:2; Şahin Məmmədov 8:3; Urfan Əsədov 9:3; Vüqar Salamlı 10:3

İlk tur başa çatdı

“ADR - 90” Futzal Turniri start götürdü. Aprel ayının 5-i turnirin açılış matçında meydançaya Dalğa və Rotarakt komandaları çıxdı. İlk matçda daha sürətli oyun nümayiş etdirən dalğaçılar hesabda irəli çıxaraq sonadək üstünlüyü əldən vermədilər. Hər iki komanda meydançada əzmkarlıq nümayiş etdirsə də qapı istiqamətində daha çox, qüvvətli və dəqiq zərbələr endirən dalğaçılar yekun hesabı 9:2 etməklə qələbələrini rəsmiləşdirdilər. Dalğanın hücumçusu Rövşən İsmayılov bu oyunda 5 qol vurmaqla bombardirlər siyahısında birinci yerə qalxdı.

Günün ikinci oyununda İrəli və ALGA komandaları öz qüvvələrini sınadılar. Çox gərgin keçən matç 4:4 hesabı ilə nəticələndi. Komandalar sonuncu saniyəyədək yüksək templi oyun göstərmiş, hesabda geriyə qalmağa baxmayaraq möhkəm iradə nümayiş etdirmişlər. Xüsusi olaraq hər iki komandanın qapıçılarının gözəl oyununu qeyd etmək lazımdır. Bu matç göstərdi ki, növbəti mərhələyə çıxmaq üçün A qrupunda çox gərgin mübarizə gedəcəkdir.

İlk turun ikinci günündə B qrupunun komandaları mübarizəyə başladı. Günün ilk oyununda AAA və AN, ikinci oyununda isə OL və Stimul komandaları meydançaya çıxdılar. Yekun nəticədə AAA və OL rəqiblərinə böyük hesabla qalib gəlsələr də hər iki matç maraqlı və mübarizə ilə bol oldu. Daha kollektiv oyun nümayiş etdirmiş AAA və OL 11:1 və 12:0 hesabı ilə müvafiq olaraq AN və STİMUL üzərində qələbələrini rəsmiləşdirdilər. İkinci günün oyunlarında OL-un hücumçuları Sənan Mirzəyev və Urfan Əsədov müvafiq olaraq 4 və 3 qolla bombardirlər siyahısına öz adlarını əlavə etdilər.

Növbəti turun oyunları 12 və 13 apreldə keçiriləcək. Oyunların proqramı aşağıdakı kimidir.

12 aprel 12:00 OL - AN
12 aprel 13:00 AAA - Stimul
13 aprel 14:00 Dalğa - ALGA
13 aprel 15:00 İrəli - Rotarakt

OL - Stimul 12:0

6 aprel, 15:00. Olimpik Star

1-ci hissə: Sənan Mirzəyev 1:0; Vüqar Salamlı 2:0; Vüqar Hüseynli 3:0

2-ci hissə: Urfan Əsədov 4:0; Sənan Mirzəyev 5:0; Vüsal Əliyev 6:0; Sənan Mirzəyev 7:0; Sənan Mirzəyev 8:0; Urfan Əsədov 9:0; Vüsal Əliyev 10:0; Urfan Əsədov 11:0; Rəşad Həsənov 12:0

AAA - AN 11:1

6 aprel, 14:00. Olimpik Star

1-ci hissə: Elçin İbadov 1:0; Tural Yusifov 2:0; Azər Məmmədov 3:0; Balaş Qasımov 3:1

2-ci hissə: Cavid Məmmədov 4:1; Tural Yusifov 5:1; Dmitriy Kirillov 6:1; Elçin İbadov 7:1; Tagı Tagı zadə 8:1; Cavid Aslanov 9:1; Dmitriy Kirillov 10:1; Tagı Tagı zadə 11:1

İrəli - ALGA 4:4

5 aprel, 13:00. Olimpik Star

1-ci hissə: Xəyal Niftəliyev 1:0; Elnur Adıyev 1:1; Ruslan Əmirov 1:2; Xəyal Niftəliyev 2:2; Firdovsi Tahirov 3:2

2-ci hissə: Elnur Adıyev 3:3; Cavid Abdullayev 3:4; Firdovsi Tahirov 4:4

Sarı vərəqə: Elnur Adıyev (ALGA)

Dalğa - Rotarakt 9:2

5 aprel, 12:00. Olimpik Star

1-ci hissə: Rövşən İsmayılov 1:0; Rövşən İsmayılov 2:0; Emin Rəsulzadə 3:0

2-ci hissə: Elşən Poladlı 4:0; Araz Qasımov 5:0; Rövşən İsmayılov 6:0; Kamal Haqverdiyev 6:1; Kamal Haqverdiyev 6:2; Emin Hüseynov 7:2; Rövşən İsmayılov 8:2; Rövşən İsmayılov 9:2

Sarı vərəqə: Elnur Ağayev (Rotarakt)

"ADR - 90" Futzal Turniri start götürür

Azərbaycanda fəaliyyət göstərən 8 gənclər təşkilatının təşəbbüsü ilə Azərbaycan Demokratik Respublikasının yaranmasının 90 illiyinə həsr olunmuş futzal turniri başlayır. “ADR - 90” Futzal Turniri 5 aprel – 4 may tarixləri arasında “Olimpic Star” İdman Kompleksində keçiriləcəkdir. Turnirdə aşağıdakı gənclər təşkilatların komandaları iştirak edəcək:

- ABŞ təhsilli Azərbaycanlı Məzunlar Assosiasiyası (AAA)
- AN Şəbəkəsi (AN)
- Azərbaycan Liberal Gənclər Assosiasiyası (ALGA)
- Bakı Rotarakt Klubu (Rotarakt)
- DALĞA Gənclər Hərəkatı (Dalğa)
- İRƏLİ Ümumrespublika Gənclər Hərəkatı (İrəli)
- OL Azərbaycan Gənclər Hərəkatı (OL)
- STİMUL Gənclər Şəbəkəsi (Stimul)

Püşkatma nəticəsində komandalar 2 qrupa bölünmüşdür. A qrupunda Dalğa, İrəli, ALGA, Rotarakt, B qrupunda isə OL, AAA, AN, Stimul komandaları iştirak edəcəklər.

Hər qrupda birinci iki yeri tutan komandalar yarımfinala çıxacaqlar. Yarımfinal oyunlarında qalib gələnlər isə 4 may tarixində keçiriləcək final oyununda iştirak edəcəklər.

Turnirin ilk turunun qrafiki aşağıdakı kimidir:

5 aprel 12:00 Dalğa – Rotarakt
5 aprel 13:00 İrəli – ALGA
6 aprel 14:00 AAA – AN
6 aprel 15:00 OL - Stimul

Azarkeşləri öz komandalarını dəstəkləməyə çağırırıq.